《燒賣界桂錀鎂》



    講到燒賣,大家對好食嘅定義都唔同。有人追求魚味濃,有人鍾意煙韌啲,又有人覺得個汁先係精華所在 。我哋公司有個好鍾意食燒賣嘅同事,佢對燒賣嘅熱愛已經去到一個令人匪夷所思嘅程度。

    每朝返工,都見到佢喺個位度吉住燒賣上facebook。有時下晝三四點,佢話出去食支煙,點知轉個頭又揸住兜燒賣行入office, 一路食一路笑到含春咁。食到最後,奶埋支竹籤都唔夠,仲要飲埋剩嗰啲萬年豉油,我心諗:「有無咁好食呀?」最變態嘅係,連裝燒賣個兜佢都要搓乾搓淨,之後偷偷地收埋喺櫃桶以為無人知。有次俾我𥄫到佢做做吓嘢,突然間拎啲兜出嚟索兩索,再靜雞雞擺返入去。

    見佢食得咁和味,搞到我成日都想試下。嗰日返工我特登行去個檔口,一見到夾燒賣個姐姐仔,成個桂綸鎂咁,我當堂窒一窒:「一……串燒賣呀唔該!」

    咬咗一啖,我先知道原來醉翁之意不在酒……


    #為咗佢我可以燒賣當飯食 #召集所有鍾意食燒賣嘅朋友 #講講吓有啲肚餓添 #求高質燒賣推介 #我討厭廣告