《激嬲阿媽嘅後果》



    得罪邊個都好,千祈唔好得罪米飯班主。點解我會咁講?件事係咁嘅……


    話說前幾日動漫節,為咗可以準時接我心愛嘅初音bb攬枕 返屋企,喺臨收工嘅十五分鐘前,我已經熄定部電腦、孭定背囊。一搭正, 行過老細間房,佢望住我再望一望個鐘。我諗佢應該俾我嗰種自信震攝到,仲未黎得切講嘢,我已經衝咗入lift。皇天不負有心人,去到個檔,最後一個都俾我買到。嗰晚我特登夜啲返,諗住等佢地全部瞓晒,我就可以偷偷摸摸拎返入房,點知一打開門就出晒事。


    「衰仔,收埋咗啲咩喺後面呀!」


    突然間,客廳嘅燈著晒。見到阿媽企喺廳中間,塊面仲黑過月亮emoji,嗰一刻我覺得自己好似走私軍火俾FBI斷正咁,嚇到俾唔到反應。


    「錢就亂咁洗,家用又唔俾!」佢繼續講。


    「唔俾咪唔俾囉!吹呀!」我一時火遮眼,爆咗句咁嘅嘢。佢聽到我咁講,即刻㷫過火屎:


    「衰仔!唔幫屋企手仲咁惡! 聽日開始我唔煮飯啦, 三餐你哋自己搞掂啦!」

    結果,我成功激嬲咗佢。


    嗰次之後,我每晚都要一手攬住我嘅初音bb,一手碌外賣app。俾阿媽棄養嘅日子,唯有嗌返個自己最鍾意嘅日式咖哩豬扒飯加隻溫泉蛋,慰藉下受傷嘅心靈。


    #阿媽要罷工 #唔好話我唔提醒你 #得罪米飯班主後果自己諗#deliveroo #我討厭廣告