《每個男人係 office 都有一個不可告人嘅秘密 上》



呢一日,任職 Graphic Designer 嘅阿明遞咗信辭職。同好多打工仔一樣,平日除咗訓覺之外,佢大部分時間都喺 office 度過。 整整5年嘅光陰,對於阿明嚟講,呢度唔止係一張工作枱,更加係一個屬於佢自己嘅秘密空間。曾經佢都諗過:「擺咁多嘢喺度,第日辭職咪有排搬?」而家,佢終於要轉去另一個工作環境,望住呢個即將唔屬於佢嘅位,佢最放唔低嘅,始終係枱面一隻隻陪咗佢好多年嘅真頭玩具(Real Head)。


阿明一手拎起電腦隔離隻鈦金混色 Chaos Man, 記得當初聽到真頭去台北開 pop up store,仲讀緊書嘅佢二話不說,買咗張機票走兩日堂飛台灣。嗰陣為咗買到佢,佢前一晚一落機,行李都未放低,就即刻去咗排隊。去到嘅時候,前面已經有成十條友。拎住支籤,阿明嘅內心有啲忐忑,一嚟驚買唔到想要嘅款,二嚟擔心如果同時睇中咗幾隻咁點搞呢 。最後俾佢買到最後一隻限定抽選,嗰排,佢開心到去邊都要拎隻 Chaos Man出嚟影相,成個龍友咁,搞到身邊班friends都忍唔住笑佢癲。

喺 Chaos Man 隔離嘅,係阿明硬食三倍炒價,喺網上面買返嚟嘅三面骷髏黑白混膠。原本佢想抽透明嗰隻款,但呢啲特別色又點會咁易俾你抽到呀!阿明睇住隻嘢俾炒家買走, 日日怨念深重咁 mon 住個 carousell,見住個價有升無跌,佢睇咗幾晚都買唔落手。最後連透明款俾人買走,得返隻黑白混色,佢先把心一橫,用大半個月人工入咗手。而家諗返真係好彩當初買咗, 而家就算有錢都無人肯放。


放喺文件架最上面嗰隻紅色嘅異形真頭係阿明喺一個本地聯展嘅戰利品,對佢嚟講亦係最具意義嘅一隻。嗰陣阿明啱啱開始儲 Sofubi,成日聽講每個男人一定要有一隻真頭,咁啱佢哋又嚟香港擺檔,所以就懷住朝聖嘅心態入場 。一去到,見到檯面擺咗幾十隻唔同款,阿明俾隻紅色異形吸引住,就諗都唔諗買咗落嚟。點知俾成班玩膠嘅 friend 鬧佢:「搞錯呀,係都買one-off 會場限定啦!」雖然係咁,但對於阿明嚟講,呢隻紅色異形正正標誌住阿明入坑嘅開始,況且忠於自己嘅喜好比起追求限量更重要。


初初,阿明將呢一隻隻真頭放喺屋企個書櫃上。但結婚後,當連僅有嘅私人空間都俾老婆嘅化妝品侵佔埋,佢唯有默默將心愛嘅公仔入落個箱度搬返公司, 然後好小心咁將佢哋逐隻放喺電腦枱面。望住成枱公仔,佢知道自己已經返唔到轉頭,因為連床下底個位,都俾老婆拎嚟擺阿仔嘅單車。

呢個時候,有個好熱心嘅同事走過嚟問阿明:「你要唔要紅白藍呀?我呢度有個喎。」阿明對住佢苦笑咗一下,心入面講咗句:「你知唔知幾錢一個㗎...... 」 再客客氣氣咁對住個同事講 :「唔洗啦,我叫人上嚟搬得啦。」


#每個男人係office都有一個不可告人嘅秘密 #鍾意玩膠唔係罪 #真頭玩具 #RealHead #自助迷你倉 #迷你倉 #BoxfulHK #我討厭廣告 #sofubi

  • Facebook Basic Black
  • Black Instagram Icon