《密實袋之謎》



話說我啱啱入職嗰陣,成日都形住間公司有唔妥。有幾唔妥? 例如office清潔得好密,長期好大陣消毒水味。有時返返下工,會見到老細抽住一袋二袋急急腳行入房。 而且,唔知點解老細成日戴住手套,仲要係醫院個隻,又唔俾我哋入佢間房。有次同事叫我入Pantry搵餐具,我一打開個櫃,見到全部都係密實袋 。因為咁,我好肯定老細背後一定搞緊單大茶飯。


直到有次收工,我落到地鐵先發現自己漏咗個銀包喺office,就狗衝返去拎啦。上到去,成個office得老細間房著咗燈,隔住個門罅,我見到老細正喺度將啲不知名物件入落密實袋。我諗住遲早都一鍋熟,不如等我出手好過之後俾人冚檔啦。身為正義嘅化身,我一腳踢開道門,佢呆晒咁望住我。嗰一刻,我見到佢隻手揸住條百力滋 。


「做…做……做咩呀你?」老細嚇到口都窒埋。


「咩黎㗎呢啲!」我指住檯面堆密實袋 。


「獨立包裝百力滋囉!」佢好委屈咁講。


「哦~」嗰下我尷尬到連完整句子都講唔到。


第二日我同同事講返件事,佢哋個個笑到收唔到聲。我氹咗好耐,佢哋先肯同我講個真相:原來老細係有嚴重潔癖㗎!


#潔癖 #公司仲乾淨過屋企 #就快連紙巾都要獨立包裝 #佳能密實袋#GladHK #office日常 #我討厭廣告

  • Facebook Basic Black
  • Black Instagram Icon