《你對上一次唱K係幾時?》




有次返工食lunch,聽到某個同事問新嚟個00後part-time妹妹:「你哋啲同學仲興唔興唱K㗎?」先恍然大悟,原來不知不覺間,唱K已經變成老餅嘅活動。


有人話唱K文化嘅沒落,印證咗廣東歌嘅沒落。的而且確,唔知幾時開始,身邊嘅人開始唔聽廣東歌。


今晚,公司Annual dinner完有同事提議下場去唱K。一坐低,我就迫不及待咁用app點咗首謝霆鋒嘅《無聲仿有聲》。前奏一響起,嗰個part-time妹妹擰轉頭問:「邊個點㗎?」班差唔多年紀嘅同事即刻一齊dup低頭玩電話。見無人出聲,佢又加多句:「乜謝霆鋒唔係廚師嚟㗎咩?」唔知係咪因為心虛嘅關係,我覺得佢呢句說話係講俾我聽,所以我即刻將個咪遞咗俾隔離個個,若無其事咁講:「唔知喎,無人唱就cut咗佢啦~」 佢見到我口窒窒又面有難色咁,就好體貼咁默默地幫我切咗歌。


記得以前無論咩事都會約去唱K。最鍾意考完試同班同學怒唱LMF嘅《唱衰學校》 。如果有人失戀,就一定要唱容祖兒嘅慘情四部曲。但係自從越黎越少人聽廣東歌之後,去到K房,大家都係各唱各。有人唱國語歌,有人唱英文歌,甚至係Kpop、Jpop。就好似我今晚咁,一路on 99望住個00後唱BTS,一路諗起班friend 呢幾年都漸漸各行各路……


喺旺中都淨係播Kpop嘅時代,可能得食M記嘅時候,你先會聽到一兩首廣東歌。雖然係咁,大家嘅手機入面都總會有個舊歌playlist, 由始至終,你都係覺得廣東話最熟悉。


呢個時候,有人點咗陳奕迅首《最佳損友》。突然間,我有種去完長途旅行,一落機聽到廣東話嘅感覺。當我周圍搵緊支咪嘅時候,我發現隔離嗰個80後嘅同事已經激動到企咗起身。係時候到我哋表演啦。見到part-time妹妹係坐喺一邊碌埃豬,我哋都不約而同咁長嘆一口氣,因為大家都知道,呢首《最佳損友》係要全部人一齊合唱,先有佢嘅意義所在。

就好似Chef Le Mon喺《無聲仿有聲》個MV最後咁講:

「只要有共鳴 無聲亦動聽」


#賞聽給我愛過的廣東歌音樂會 #同路人 #叱咤903 #土生土唱 #廣東歌#香港人 #唱k #我討厭廣告

  • Facebook Basic Black
  • Black Instagram Icon